काठमाडौं: गैर आवासीय नेपाली संघ (एनआरएनए) ले पूर्व अध्यक्ष शेष घलेसहित १८ जनालाई संस्थाको नाम, लोगो र लेटरहेड प्रयोग नगर्न भन्दै चेतावनी पत्र पठाएको छ।
बालुवाटारस्थित एनआरएनएको सचिवालयले विनोद कुँवर नेतृत्वको एनआरएनएका पदाधिकारीसहित डा. घलेलाई संघको नाम, लोगो र लेटरहेड प्रयोग नगर्न भन्दै चेतावनी पत्र पठाएको हो ।
संघका प्रमुख कार्यकारी निर्देशक रवीकिरण अधिकारीले ईमलेमार्फत पठाएको पत्रमा संघ गैर आवासीय नेपाली सम्बन्धी ऐन, २०६४ को १६ र गैरआवासीय सम्बन्धी नियामावली, २०६६ को नियम १२ बमोजिम नेपालको परराष्ट्र मन्त्रालयमा दर्ता भएको र उद्योग विभागमा टेर्डमार्क समेत भएको भन्दै झुकिने वा भम्र सिर्जना गर्ने किसिमले संस्थाको नाम, लोगो र लेटरहेडको दुरुपयोग नगर्न भनीएको छ ।
संघको ट्रेडमार्कको प्रयोग गरेर बनाइएका छाप, लेटरहेड लगायतका सामग्री १५ दिनभित्र नष्ट गरी सोको जानकारी समेत गराउन सचिवालयले अल्टिमेटम दिएको छ। अब उप्रान्त संघको नाम, लोगो र लेटरहेड प्रयोग गरेर अनाधिकृत र गैरकानूनी ढंगले गतिविधि गरेमा कानूनी प्रक्रियामार्फत कारवाही हुने उल्लेख गरेको छ ।
संघको गत १० औं महाधिवेशनमा विवाद भएपछि डा. घले समूहले कुँवर नेतृत्वमा छुट्टै कार्यसमिति गठन गरेको थियो । तर परराष्ट मन्त्रालयले संस्थापन समूहलाई मान्यता दिएको थियो ।
पछिल्लो समय दुवै समूहले एकताको लागि भन्दै कार्यदल गठन गरेपनि वार्ता नहुँदै सचिवालयले यस्तो चेतावनी पत्र पठाएको छ । कतिपयले एनआरएनएमा एकताको प्रयास गरिरहँदा एकता नचाहने पक्षको दबामा यस्तो पत्र पठाएको दावी गरेका छन् । तर यसबारेमा कुँवर समूहबाट कुनै धारणा आएको छैन ।
प्रकाशित | १ जेष्ठ २०८०, सोमबार २०:११
