कतार : गैर आवासीय नेपाली संघ (एनआरएनए ) कतारले कोभिड प्रभावीत नेपालीलाई राहत वितरण अभियान जारी राखेको छ । कोभिड प्रभावीतलाई निरन्तर रुपमा राहत वितरण जारी राखेको एनआरएनए कतारले दसौं चरणमा आइपुग्दा थप ६ सय १७ जना नेपालीलाई राहत वितरण सम्पन्न गरेको छ ।
एनआरएनए कतारका अध्यक्ष मोहम्मद मुक्तदा मुसलमानका अनुसार पछिल्लो समय एनआरएनएद्धारा गठित उद्दार तथा राहत बितरण समितीले अठौ चरणमा ३ सय ८ जना, नवौ चरणमा २ सय जना र दसौं चरणमा ६ सय १७ जना नेपालीलाई राहत वितरण गरेको हो । राहत कतारको विभिन्न ठाउँमा वितरण गरिएको हो ।
अध्यक्ष मुक्तदाका अनुसार राहत आइसिसी सल्लाहकार टिवी कार्की, मध्य पूर्व संयोजक प्रवीण गुरुगं, आइसिसी सदस्य रमेश भट्ट, राहत वितरण समिति संयोजक, समिती सदस्य तथा पदाधिकारीलगायतको सहभागितामा वितरण गरिएको हो ।
बिश्वब्यापी रुपमा देखा परेको करोना भाइरस (कोभिड १९) नियन्त्रण गर्ने क्रममा कतार सरकारले आफ़्नो नागरिक र आप्रवासी नागरिक सबैका लागि समान ब्यवहार गर्दै उच्च स्वास्थ्य सतर्कता तथा रोकथामको लागि विभिन्न सावधानीहरू अपनाएको पनि अध्यक्ष मुक्तदाले बताउनुभयो ।
प्रकाशित | १६ जेष्ठ २०७७, शुक्रबार १३:२३