काठमाडौं । हरेक बर्ष नेपालमा कम्तीमा एक सयदेखि १२० दिनसम्म मनसुन सक्रिय हुन्छ । कुनै बर्ष ढिला गरि मनसुन सक्रिय हुन्छ भने केही बर्ष समयमै मनसुन सक्रिय हुने गर्दछ । सामान्यतया जुन १० देखि मनसुन सक्रिय हुने गर्दछ भने अक्टोबरको १२ सम्ममा मनसुन सकिन्छ ।
यो बर्ष समयमै जुन १२ मा नेपालमा मनसुन भित्रिएको थियो । समयमै मनसुन भित्रिएसँगै सामान्यनै बर्षा हुने धेरैको आंकलन थियो । तर यो बर्षको मनसुन विगतमा भन्दा धेरै सक्रिय देखिएको छ । अघिल्लो बर्ष अक्टोबर १२ मा मनसुन सकिएको थियो । यो बर्ष सोही हाराहारीमा मनसुन सकिने अपेक्षा गरिएको थियो । तर असोज ६ गतेदेखिको अविरल बर्षासँगै मनसुन केही बढ्न सक्ने आंकलन गरिएको छ ।
असोज ६ बाट देशका विभिन्न ठाउँमा निरन्तर भइरहेको वर्षाका कारण फेरि विपद्जन्य घटना बढ्न थालेको छ । निरन्तरको वर्षाका कारण विपद्जन्य घटनाबाट तीन दिनमा १७ जनाको मृत्यु भएको छ भने १५ जनाभन्दा बढी बेपत्ता भएका छन् । गृह मन्त्रालयअन्तर्गतको राष्ट्रिय आपतकालीन कार्यसञ्चालन केन्द्रका अनुसार ६, ७ ,८ र ९ असोजमा पहिरो, बाढी जस्ता प्राकृतिक विपद्का घटनाबाट १८ जनाको मृत्यु भएको हो । केही वेपत्ता भएका छन् । यी चार दिनमा सबैभन्दा बढी बिहीबार मात्रै १४ जनाले ज्यान गुमाएका थिए ।
राष्ट्रिय आपतकालीन कार्यसञ्चालन केन्द्रका प्रमुख मुरारी वस्तीका अनुसार बिहीबार मात्रै बाढी र पहिरामा परी १४ जनाको ज्यान गएको हो । उहाँका अनुसार यो बर्ष यसपटक ९० प्रतिशत क्षति पहिरोबाट भएको छ ।
पूूर्व पश्चिम राजमार्ग अन्तरगत बिनयी त्रिवेणी गाउँपालिका दुई दाउन्नेको बिश्वकर्मा मन्दिर नजिकै बिहिबार बेलुकी माथिबाट खसेको पहिरोसँगै बस भिरबाट तल खस्दा एक जनाको मृत्यु भएको छ । ६ जना घाईते भएका छन् ।
मृत्यु हुनेमा रुकुम पश्चिम आठबिसकोट गाउँपाकिला १० बस्ने २५ वर्षको हरिषचन्द्र केसीको गए राति मृत्यु भएको जिल्ला प्रहरी कार्यालय नवलपरासी पूर्वका प्रहरी नायव उपरीक्षक मोहनबहादुर खाँणले जानकारी दिनुभयो ।
बसमा १८ जना सवार रहेका थिए । प्रहरी र स्थानीयको टोलीले उद्धार गरि घाईते सातजनालाई पुरानो मेडिकल कलेज लगिएको थियो । घाईतेमध्ये एक जनाको मृत्यु भएको हो । बसमा सवार अन्य ११ जनाको अवस्था सामान्य छ ।
सयौं ठाउँमा अवरोध हटाएर सडक खुले
यो बर्षको मनसुन सकिनै लागेको छ । मनसुन सकिन लागेको समयमा यो झनै सक्रिय बन्दा यसले भौतिक तथा मानविय क्षति समेत गरेको छ । एक सातादेखिको भारी वर्षासँगैको बाढी र पहिरोले देशभरमा सडकमा निक्कै क्षति पारेको सडक विभागले जनाएको छ । सडक विभागका अनुसार राष्ट्रिय राजमार्गमा मात्रै एक दर्जनभन्दा धेरै स्थानमा पहिरोले असर पारेको छ ।
शुक्रबार बिहानसम्म देशभरका २० वटाभन्दा धेरै राष्ट्रिय राजमार्ग पहिरोले अवरोध पारेको छ । मंगलबार, बुधबार र बिहीबारसँगै शुक्रबारसमेत भैरहेको बर्षाको कारण देशभरमा एक सयभन्दा धेरै स्थानमा भएको अवरोध हटाएर एकतर्फी तथा दुईतर्फी रुपमा सडक खुल्ला गरिएको सडक विभागले जनाएको छ ।
पहिरोका कारण बन्द भएको नारायणगढ–मुग्लिन सडकको मुग्लिन नजिक चार किलोमा पृृथ्वी राजमार्गको कुरिनटार, बिपी राजमार्गको सेल्फी डाँडामा एकतर्फी सडक खुलेको छ । सो स्थानमा बुधबार बिहानदेखि नै पहिरोले सडकमा अवरोध सिर्जना गरेको थियो ।
सडक विभागका अनुसार सिद्धार्थ राजमार्गअन्तर्गतको पिपलडाँडामा सडक अवरोध जारी छ । यस्तै, कान्तिपथअन्तर्गत भालुखोला, छपेलीमा पनि सडक अवरुद्ध भएको थियो । बेनी जोमसोम कोरोला सडक अन्तर्गत काभ्रे र रुप्सेमा सडक अवरुद्ध छ । बेंसीसहर चामे सडकअन्तर्गत घोप्टे खोलामा पनि सडक अवरुद्ध भएको थियो ।
सडक विभागले भारी वर्षासँगै आएको बाढी र पहिरोका कारण क्षति पुगेर अवरुद्ध हुन पुगेका राष्ट्रिय राजमार्गअन्तर्गत ९८ स्थानमा आंशिक तथा एकतर्फी सवारी आवतजावत सुरु भएको जनाएको थियो । विभागका प्रवक्ता शिवहरि सापकोटाले क्षति पुगेका विभिन्न ठाउँमा सडक खुलाउन पहल जारी रहेको र झन्डै सय स्थानमा आंशिक तथा एकतर्फी रूपमा सडक खुलाइएको जनाएका छन् । यो समाचार आजको गोरखापत्र दैनीकमा प्रकाशित छ ।
प्रकाशित | ११ आश्विन २०७७, आईतवार ०८:२९
