जर्मनी : जर्मनीमा आयोजित २१ औँ गैरसरकारी संस्थाको सम्मेलनले नेपालको आर्थि समृद्धिका लागि प्राविधिक तथा व्यावसायिक शिक्षाको प्रवद्र्धन आवशयक भएकाले यसमा सहयोग गर्न जर्मनीस्थित विभिन्न गैरसरकारी संस्थाहरुले चासो देखाएका छन् । जर्मन नेपाल मैत्री सङ्घको आयोजनामा भएको सो सम्मेलनमा नेपालको समृद्धिका लागि प्राविधिक तथा व्यावसायिक शिक्षाको प्रवद्र्धन गर्नु आवश्यक भएको भन्दै यसका लागि बाह्य लगानी, प्रविधि र ज्ञान भित्र्याउन सकिने सम्भावनाका बारेमा छलफल भएको थियो ।
सो अवसरमा नेपालका लागि जर्मनीका राजदूत रोलाल्ड सेफरले जर्मनीले प्राविधिक तथा व्यावसायिक शिक्षाको माध्यमबाटै आर्थिक विकास गर्न सकेको उल्लेख गर्दै नेपालमा पनि यसलाई प्रवद्र्धन गर्न सकिने र यसमा जर्मनी सरकार र यसका संघसंस्थाहरु सहयोग गर्न तत्पर रहेको बताउनुभयो । उहाँले नेपाल आर्थिक समृद्धिको बाटोमा अगाडि लम्किरहेकाले यसलाई अझ अगाडि बढाउन पर्यटन, कृषि र रोजगारीमूलक क्षेत्रमा आवश्यक दक्ष जनशक्ति तयार गर्नका लागि प्राविधिक तथा व्यावसायिक शिक्षाको खाँचोको आवशयकता रहेकामा जोड दिनुभयो ।
नेपालका लागि जर्मनीका महावाणिज्यदूत समेत रहनुभएका अध्यक्ष राम प्रताप थापाले नेपालको प्राविधिक शिक्षाका क्षेत्रमा काम गर्न जर्मनीमा रहेका विभिन्न संघसंस्थाहरु इच्छुक रहेकाले उनीहरुलाई यसबारेमा जानकारी गराउन र आगामी दिनमा सहयोग अभिवृद्धि गराउन सम्मेलनको आयोजना गरिएको बताउनुभयो ।
गैरआवासीय नेपाली संघ(एनआरएन)का पूर्व अध्यक्ष जीवा लामिछानेले विश्वका ८० भन्दा बढी देशमा वसोवास गर्ने गैरआवासीय नेपालीहरु आफ्नो जन्मभूमिको विकासप्रति निकै अभिप्रेरित रहेको बताउँदै ती देशहरुमा रहेका गैरसरकारी संस्थाहरुसँग सहकार्य गरी नेपालको विकासमा क्रियाशील रहँदै आएको उल्लेख गर्नुभयो ।
सम्मेलनमा नेपाललाई सहयोग गर्दै आएका जर्मनीमा कार्यरत विभिन्न संस्थाका प्रतिनिधिहरुले धारणा राख्नुभएको थियो । सो अवसरमा नेपालका तर्फबाट राससका कार्यकारी सम्पादक कृष्ण अधिकारीले गैरसरकारी संस्थाको वर्तमान अवस्था र पत्रकार पोषनाथ अधिकारीले नेपालमा प्राविधिक शिक्षा चुनौती र अवसर विषयकमा कार्यपत्र प्रस्तुत गर्नु भएको थियो । सम्मेलनमा जर्मनीमा रही विभिन्न संघसंस्थामा आवद्ध रहेका नेपाली तथा जर्मनीका विभिन्न गैरसरकारी संस्थाका गरी करीब ६०.जनाको सहभागिता रहेको थियो ।
प्रकाशित | १५ भाद्र २०७६, आईतवार १०:४०
