सिन्धुपाल्चोक : चीन जोड्ने उत्तरको मुख्य तातोपानी नाकाबाट पछिल्लो एक साताबाट शुरु आयात कारोवार विस्तारै बढ्दै गएको छ । एक महीनाअघि पुनः सञ्चालनमा ल्याइएको चीन जोड्ने उत्तरको मुख्य तातोपानी नाकाबाट चिनियाँ सामग्री नेपाल भित्रिन शुरु भएसँगै कारोबार बढ्दै गएको हो ।
विसं २०७२ वैशाख १२ को विनाशकारी भूकम्पपछि चार वर्ष बन्द भएको नाका गत जेठ १५ गतेबाट औपचारिकरूपमा पुनः सञ्चालनमा ल्याइएको थियो । नवनिर्मित अत्याधुनिक सुक्खा बन्दरगाह सरेको तातोपानी भन्सार पुनः सञ्चालनको झण्डै तीन साता प्रशासनिक व्यवस्थापन र आन्तरिक तयारीमा जुट्दा व्यापारिक कारोवार हुनसकेको थिएन ।
“चीनबाट सामग्री भित्रिन थालेको छ”, भन्सार अधिकृत केशवराज ओलीले भन्नुभयो । भन्सारले कारोवार शुरु गरेयता विस्तारै आयात बढ्दै गएको उहाँले बताउनुभयो । ओलीका अनुसार यसबीचमा १० कन्टेनर सामान भन्सार जाँचपास भई राजधानी गइसकेको छ । सुक्खा बन्दरगाह भन्सार यार्डमा अझै चार कन्टेनर सामान जाँचपासको पर्खाइमा छन् ।
प्रकाशित | २७ असार २०७६, शुक्रबार १२:३७
