एजेन्सी – इंग्लिस प्रिमियर लिग फुटबलमा लिभरपुलले जित निकालेको छ । प्रिमियर लिग अन्तर्गत शुक्रबार राति भएको खेलमा लिभरपुलले साउथह्याम्पटनमाथि ३–१ को जित निकालेको हो । लिभरपुलको जितमा मोहम्मद सलाह, नावी केइटा र जोर्डन हेन्डरसनले गोल गरे । साउथह्याम्पटनका साने लङले गोल गरे ।
लिभरपुलले एक गोलले पछि परेको स्थिति उल्ट्याएर महत्वपुर्ण ३ अंक जोडेको थियो। खेलको नवौं मिनेटमा साने लङले पिएरे इमिलको पासमा गोल गर्दै घरेलु टोलीलाई सुरुवाती अग्रता दिलाएको थियो । ३६औं मिनेटमा नावी केइटाले गोल गरेपछि लिभरपुल खेलमा फर्किदा पहिलो हाफ १–१ को बराबरीमा सकिएको थियो ।
८०औं मिनेटमा मोहम्मद सलाहले गोल गरेपछि लिभरपुलले खेलमा २–१ को अग्रता बनायो । यससँगै सलाह लिभरपुलका लागि छिटो ५० गोल पार गर्ने पहिलो खेलाडी बने । सलाहले ६९ खेलमा ५० गोल गर्न सफल भए । यसअघि फर्नान्डो टोरेसले ७२ खेलमा ५० गोलको आँकडा पार गरेका थिए । लुइस स्वारेजले ८६ तथा रोवी फोलेर ८६ खेलमा ५० गोल गरेका छन् ।
८६औं मिनेटमा जोर्डन हेन्डरसनले गोल गर्दै लिभरपुललाई ३–१ को जित दिलाएर महत्वपुर्ण ३ अंक दिलाए । हेन्डरसनले २०१७ पछि लिभरपलुका लागि पहिलो गोल गरे । जितसँगै लिभरपुल पुनः लिगको शीर्षस्थानमा उक्लिएको छ । लिभरपुलको ३३ खेलबाट ८२ अंक पुगेको छ । एक खेल कम खेलेको म्यानचेस्टर सिटीको ८० अंक रहेको छ । प्रिमियर लिगमा अब ५ खेल बाँकी छ ।
प्रकाशित | २३ चैत्र २०७५, शनिबार ०८:१०
