भक्तपुर: सूर्यबिनायक नगरपालिका वडा नं. ८ मा अवस्थित केदारनाथको शिर डोलेश्वर महादेवको मन्दिरमा श्रावण १ गतेदेखि भाद्र ६ गतेसम्म ३८ दिने श्रावणी मेला हुने भएको छ । केदारनाथको शिर डोलेश्वर महादेव संरक्षण तथा विकास समितिका अनुसार श्रावण १ गते बिहान ७ बजे चन्द्रबिनायक मन्दिरदेखि डोलेश्वर मन्दिर परिसरसम्म कलशयात्रा गरी ३८ दिने मेलाको सुरुवात गरिने भएको हो ।
समितिका अध्यक्ष धर्मराज बस्नेतका अनुसार सोही दिन कलशयात्रापछि मन्दिर परिसरमा आयोजित एक कार्यक्रमकाबीच सूर्यविनायक नगरपालिकाका नगर प्रमुख बासुदेव थापाले श्रावणी मेला र सूर्यविनायक नगरपालिकाबाट निर्माण भएको मूल द्वारको उद्घाटन गर्नुहुनेछ ।
यस्तै, श्रावण २ गतेदेखि ८ गतेसम्म प. जनार्दन पौडेलबाट शिवपुराण कथा बाचन, श्रावण ९ गतेबाट १५ गतेसम्म प। उदयनारायण बाँस्कोटा शास्त्रीबाट पुरुषोत्तम माहात्ये, श्रावण ६ गतेबाट २२ गतेसम्म पं राघव अर्यालबाट श्रीमद्भागवत् महापुराण, श्रावण २३ गतेबाट २७ गतेसम्म प। बालकृष्ण अर्यालबाट विभिन्न धार्मिक प्रवचन, श्रावण २८ गतेबाट भाद्र ५ गतेसम्म विभिन्न गुरुहरुबाट धार्मिक प्रवचन एवं कलाकारहरुबाट भजन कीर्तन र भाद्र ६ गते वार्षिकोत्सव तथा श्रावणी मेला समापन गरिने छ ।
मेलाको लागि समितिले सुरक्षा व्यवस्थाका साथै मन्दिर दर्शनका लागि आउने स्वदेशी तथा विदेशी भक्तजनहरुको सजताका लागि लाइन व्यवस्थापन, यातायातका साधन, स्वास्थ्य शिविर, खानेपानी लगायतको बन्दोबस्ती मिलाएको बताउनुभयो । उहाँका अनुसार यो वर्षको मेलामा ५ लाखबढी भक्तजनहरुले मन्दिरमा पूजाआजा गर्नुका साथै दर्शन गर्ने छन् । मेलामा १ करोड २५ लाख रकम संकलन हुने अनुमान गरिएको छ ।
सूर्यबिनायक नगरपालिका वडा नं. ८ का वडाध्यक्ष पुष्पराज बस्नेतले डोलेश्वरलाई धार्मिक पर्यटकीय स्थलको रुपमा विकास गर्न वडा कार्यालयले समितिसँग समन्वय गरी अघि बढिरहेको बताउनुभयो ।
समितिका महासचिव हरिशरण बस्नेतले पछिल्लो समय यस मन्दिरमा भारतीय दर्शनार्थीहरुको उल्लेख्य भीड लाग्ने गरेको जानकारी दिनुभयो ।
प्रकाशित | ३१ असार २०८०, आईतवार २०:५८
