काठमाडौँ । चीनका स्टेट काउन्सिलर तथा परराष्ट्रमन्त्री वाङ यीको तीनदिने नेपाल भ्रमणको औपचारिक घोषणा भएको छ । परराष्ट्र मन्त्रालयले विज्ञप्ति जारी गर्दै वाङ चैत ११ देखि १३ सम्म काठमाडौं आउन लागेको सार्वजनिक गरेको हो ।
परराष्ट्रमन्त्री नारायण खड्का र चिनियाँ समकक्षी वाङबीच गत कात्तिक २ मा फोन वार्ता हुँदा खड्काले वाङलाई नेपाल भ्रमणको निम्तो दिनु भएको थियो । सोही निम्तोलाई आधार मानेर वाङ शुक्रबार नेपाल उत्रन लाग्नु भएको हो । भ्रमणका क्रममा वाङले राष्ट्रपति विद्यादेवी भण्डारी र प्रधानमन्त्री शेरबहादुर देउवासँग शिष्टाचार भेट गर्ने कार्यक्रम छ । दोस्रो दिन शनिबार परराष्ट्रमन्त्री नारायण खड्का र वाङको नेतृत्वमा रहेको टोलीले द्विपक्षीय वार्ता गर्ने कार्यक्रम तय भएको छ ।
वाङले प्रमुख प्रतिपक्षी एमालेका अध्यक्ष केपी शर्मा ओली र सत्तारूढ दल माओवादी केन्द्रका अध्यक्ष पुष्पकमल दाहालसँग पनि भेट गर्नु हुनेछ । संसद्बाट अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सँगको सम्झौता अनुमोदन भएको महिना दिनभित्रै उत्तरी छिमेकी चीनका परराष्ट्रमन्त्री वाङ काठमाडौं आउन लाग्नु भएको हो ।
नेपालमा अमेरिकी सहयोगमाथि चर्चा भइरहँदा बेइजिङले पटक–पटक टिप्पणी गरे पनि नेपालले त्यसलाई अघि बढाएपछिको समयमा हुन लागेको यो भ्रमणलाई अर्थपूर्ण रूपमा हेरिएको छ ।
परराष्ट्र मन्त्रालय स्रोतका अनुसार भ्रमणका एजेन्डा भने अझै तय भइसकेका छैनन् । परराष्ट्र मन्त्रालयले अन्य मन्त्रालयसँग मिलेर एजेन्डाबारे गृहकार्य गरिरहेको छ । साथै, नेपालस्थित चिनियाँ दूतावाससँग समेत समन्वय गरेर द्विपक्षीय वार्ताको तयारी भइरहेको छ । परराष्ट्रमन्त्री वाङको नेपाल भ्रमणको पूर्वतयारीलाई मध्यनजर गरेर चिनियाँ राजदूत होउ यान्छीले परराष्ट्रमन्त्री खड्का, सभामुख अग्नि सापकोटा, माओवादी केन्द्रका अध्यक्ष पुष्पकमल दाहाल, गृहमन्त्री बालकृण खाँणलगायतसँग भेटवार्ता गरि सक्नु भएको छ ।
२०७६ असोज २५ र २६ मा २३ वर्षपछि चीनका राष्ट्रपतिका रूपमा सीले नेपालको दुईदिने राजकीय भ्रमण गर्नु भएको थियो । । त्यस बेला परराष्ट्रमन्त्री वाङ भ्रमण दलका मुख्य सदस्य रहनु भएको थियो । परराष्ट्रमन्त्री वाङले सन् २०१५ जुनमा पनि नेपाल भ्रमण गर्नु भएको थियो । यसअघि चीनबाट २०७७ मंसिर १४ मा चिनियाँ रक्षामन्त्री वेई फङ्गेले पनि नेपालको भ्रमण गर्नु भएको थियो ।
प्रकाशित | ८ चैत्र २०७८, मंगलवार ०८:४८
