काठमाडौँ – राष्ट्रिय युवा संघ नेपाल केन्द्रीय युथ फोर्स विभागको आयोजनामा पेट्रोलियम पदार्थलगायतको मूल्यवृद्धिविरुद्ध आयल निगम घेराउ तथा विरोध प्रदर्शन गरेका छन् । शुक्रबार दिउँसो विरोध प्रदर्शनसहित संघले टेकुस्थित नेपाल आयल निगमको केन्द्रीय कार्यालय घेराउ गरेको हो ।
प्रदर्शनमा संघका केन्द्रीय अध्यक्ष किरण पौडेल र युथ फोर्स विभाग प्रमुख पुष्पराज श्रेष्ठले सम्बोधन गर्दै मूल्यवृद्धिविरुद्ध आन्दोलनलाई देशब्यापी बनाउँदै लग्ने बताउनु भयो ।
त्यस्तै, संघका नेताहरूले टेकुस्थित नेपाल आयल निगमको केन्द्रीय कार्यालयमा ज्ञापनपत्रसमेत बुझाएका छन् । विगत केही समयदेखि नेपाल आयल नियमले नेपाली जनताको ढाड सेक्ने गरी पेट्रोलियम पदार्थको मूल्यवृद्धि गरिरहेकोमा राष्ट्रिय युवा संघ नेपालको गम्भीर ध्यानाकर्षण भएको उक्त पत्रमा उल्लेख गरिएको छ ।
ज्ञापनपत्रमा भनिएको छ,“पेट्रोलियम पदार्थको मूल्यवृद्धिले यातायात, ढुवानीलगायत दैनिक उपभोग्य वस्तुहरुको मूल्यवृद्धि भइ समग्र जिविकोपार्जन र जनजीवन नै प्रभावित हुँदै आइरहेको छ । तत्कालीन प्रधानमन्त्री केपी शर्मा ओली नेतृत्वको सरकार रहँदासम्म कुनै नोक्सानी नबेहोरेको निगमको पछिल्लो समय करिब २५ अर्ब नोक्सानी देखिएको छ र निगमको घाटाको पूर्ति गर्ने बाहानामा बारम्बार भइरहने मूल्यवृद्धिको शिकार आम जनता नै बनिरहनुपर्ने स्थिति छ । यसर्थ राष्ट्रिय युवा संघ नेपाल, आयल निगमसमक्ष मूल्यवृद्धि फिर्ता गरी तपसिल बमोजिमका माग पुरा गर्न ज्ञापनपत्र पेस गर्दछ ।”
प्रकाशित | २८ माघ २०७८, शुक्रबार २०:५४
