काठमाडौं: गैर आवासीय नेपाली संघका कोषाध्यक्ष सुनील साह आगामी कार्यकालको लागि अध्यक्षमा उठ्ने तयारीमा जुट्नु भएको छ । एनआरएनए अमेरिकाको निवर्तमान अध्यक्ष समेत रहनु भएको साह विश्वका विभिन्न देशका भ्रमण गर्दै नेतृत्वको तयारीमा जुट्नु भएको हो ।
वर्तमान कार्यसमितिको कार्यकाल सकिन ७ महिना बाँकि रहे पनि साह भने विभिन्न एनसिसीमा पुगेर एनसिसीको अवस्था, समस्या र आगामी नेतृत्वका लागि अन्तरक्रिर्या तथा छलफलमा जुट्नु भएको हो । एनआरएनमा २२ महिना हराउने र दुई महिना चुनाव लाग्ने प्रवृत्तिलाई अन्त्य गर्न प्रचार प्रसारलाई भन्दा कामलाई केन्द्रमा राखेर विश्वभरका एनसिसीको भ्रमण गरिरहेको साहले बताउनुभयो ।
आइसिसीको जग भनेकै एनसिसी भएको बताउँदै साहले एनआरएनएको नेतृत्वमा जान पहिला एनसिसीको अवस्था बुझ्न जरुरी ठानेर विभिन्न देशको भ्रमणसँगै त्यहाँ रहनु भएको गैर आवासीय नेपालीहरुसँग छलफल, भेटघाट र अन्तरक्रिर्या कार्यक्रम जारी राखेको बताउनुभयो ।
विशेष गरि विश्वभर छरिएर रहेका एनसिसीमाझ पुगेर साहले एनसिसीको मुद्दा, समस्या र एनआरएनको वर्तमान अवस्थाको विषयमा अन्तरक्रिर्या गर्दा एनआरएनए एनसिसीलाई नजिकबाट बुझ्ने अवसर मिलेको बताउनुभयो ।
एनआरएनए अमेरिकाको निवर्तमान अध्यक्ष साहसँग एनसिसीको तल्लो कमिटिमा काम गरेको अनुभव छ । एनसिसीलाई सशक्त र बलियो नबनाई एनआरएनए आइसिसी पनि बलीयो बनाउन नसकिने उहाँको बुझाई छ ।
साहले आइसिसी कोषाध्यक्ष भएपछि संस्थालाई आर्थिक पारदर्शी र उत्तरदायी बनाउन महत्वपूर्ण भूमीका निर्वाह गर्दै आइरहनु भएको छ ।
गैर आवासीय नेपाली संंघको अभियानमा होमिएपछि विश्वभरि रहनु भएको गैर आवासीय नेपालीहरुको अवस्था र समस्या बुझ्न सम्बन्धीत देशको भ्रमण गरेर छलफल तथा अन्तरक्रिर्यापछि मात्र यर्थात र वास्तावीक कुराको जानकारी हुने भएकाले भ्रमण गर्ने कार्य जारी राखेको साहको भनाई छ।
चुनावी तयारीकै क्रममा साहले केहि समय अघि मात्रै एसिया प्याशिफिक र मध्यपूर्वका बिभिन्न देशको भ्रमण सम्पन्न गर्नु भएको छ । साहले यसअघि यूकेसहित यूरोपका बेल्जियम, पोर्चुगल, जर्मनी, फ्रान्स, नेदरल्याण्ड्स, स्वीटजरल्याण्ड, स्पेन, डेनमार्क लगायत सबैजसो एनसिसीको भ्रमण गर्नु भएको थियो ।
कोषाध्यक्ष साहले दोस्रो चरणको भ्रमणको क्रममा एसिया प्याशिफिकका मलेसिया, कम्बोडिया, सिंगापुर, थाईल्याण्ड र मध्यपूर्वको यूएई, कतारलगायत देशको भ्रमण सम्पन्न गर्नुभएको हो । तर कोभिडका कारण तय भएको हङकङको भ्रमण भने अन्तिम समयमा स्थगीत गर्नु परेको साह बताउनुहुन्छ ।
‘मैले एसिया प्याशिफिकका चीन, मकाउ, हङकङको पनि भ्रमण गर्ने उद्देश्य लिएर गएको थिए, तर कोभिडका कारण भ्रमण स्थगीत गर्नुपर्यो’, साहले भन्नुभयो, ‘समय मिल्यो भने पुन: छुटेका देशमा भ्रमण गर्ने सोच छ ।’
भ्रमणको क्रममा सबै एनसिसीले स्वागतसँगै अन्तरक्रिया र भेटघाट कार्यक्रमको आयोजना गरेका थिए । कार्यक्रममा धेरै जसो एनसिसीबाट गैर आवासीय नेपालीहरुले भोग्नु परिरहेको श्रम सम्बन्धी समस्याहरूबारे जानकारी प्राप्त भएको उहाँले बताउनुभयो ।
साहले भ्रमणको क्रममा एनआरएनए मलेसियाले पीडित श्रमीकहरूको लागि ठूलो सहयोग पुर्याउँदै आएको र श्रमीक धेरै भएको देशमा एनआरएनएको आवश्यकता तथा महत्व झनै बढी महसुस गरेको बताउनुभयो ।
‘कम्बोडियामा त सन् २००९ मा पहिलो पटक एनसिसी गठन भएकोमा स्थापनापछि अहिलेसम्म कोहि पनि आइसिसी पदाधिकारी पुग्नु भएको रहेनछ’, साहले भन्नुभयो, ‘स्थापना पछि भ्रमण गर्ने पहिलो आईसीसी पदाधिकारीको भूमीका निर्वाह गर्न पाउँदा र त्यहाँ रहनु भएको नेपालीको अवस्था बुझ्न पाउँदा निकै खुसी लागेको छु ।’
साहले कम्बोडियामा अन्य देशको तुलनामा श्रमिकहरूको समस्याहरू अली फरक रहेको र कम्बोडियामा नेपाली दूतावास नहुँदा नेपाली श्रमीकले तुलनात्मक रुपमा धेरै समस्या भोग्नु परिरहेकाले सरकारको ध्यान पुग्नुपर्ने बताउनुभयो । त्यस सम्बन्धमा आइसिसीलाई त्यहाँको समस्याको जानकारी गराइसकेको पनि उहाँले बताउनुभयो ।
‘थाइल्याण्डमा बस्ने नेपालीहरुले पिएनओ कार्डको तत्काल ब्यवस्था गर्न माग गर्नु भएको छ जुन कुरा मैले आइसिसीलाई पठाएको छु’, उहाँले भन्नुभयो ।
एसिया भ्रमणको क्रममा साहलाई यूएई र कतारमा नेपाली जनसम्पर्क समिति तथा कतार मधेश प्रदेश समन्वय समितिले सम्मान गरेको थियो । भ्रमणको क्रममा कतारमा एनआरएनए एनसिसीसँगै तमु समाज र कतारमा आइसीसीका प्रवक्ता सोम सापकोटा पनि सहभागि अर्को एक छुट्टै कार्यक्रममा पनि सहभागि हुनु भएको थियो ।
साहलाई विभिन्न एनसिसी भ्रमणको क्रममा सबैबाट बहुमूल्य सुझाव प्राप्त भएको थियो भने प्रत्येक कार्यक्रममा सहभागीहरूले कोषाध्यक्षहरूले गरेको वर्तमान कार्यको प्रशंसा गर्नु भएको थियो ।
मधेश प्रदेशमा ब्लड बैंक बस परियोजनाको संयोजक समेत रहनु भएको साह अहिले सो परियोजनालाई सम्पन्न गर्न लागिपर्नु भएको छ । साथै साहले भ्रमण गर्न बाँहि देशहरुमा पनि चाँडै भ्रमण गर्ने योजना रहेको बताउनुभयो ।
प्रकाशित | ८ माघ २०७९, आईतवार २१:५५
