दोलखा : आगामी मंसिर ४ मा हुने प्रतिनिधि तथा प्रदेश सभा निर्वाचनलाई लक्षित गरी नेकपा एमाले दोलखाले घरदैलो कार्यक्रमलाई तीव्रता दिएको छ ।
नेकपा एमाले दोलखाले जिल्लाका सबै ५१ हजार परिवारलाई भेट्ने लक्ष्यसहित ‘४८ हजार घर पुगौं, ५१ हजार परिवार भेटौं’ अभियान सुरू गरेसँगै पार्टीका नेता तथा कार्यकर्ताहरूले घरदैलो अभियानलाई तीव्रता दिएका हुन् ।
घरदैलो अभियानमा नेकपा एमाले दोलखाले सम्पूर्ण वडा तथा टोल कमिटीहरू परिचालन गरिएको नेकपा एमाले भीमेश्वर नगरका चुनावी कमाण्डर तथा नेकपा एमालेका कार्यवाहक अध्यक्ष राजेन्द्र मानन्धरले जानकारी दिनु भयो ।
उहाँका अनुसार ९ वटा पालिकाका ७४ वटा वडाहरूमा पहिलो चरणको घरदैलो अभियान सम्पन्न भई दोस्रो चरणको अभियान सुरू भएको छ ।
जिल्लाकै सबैभन्दा बढी मतदाता भएको भीमेश्वर नगरपालिकामा चुनावी प्रचार अभियान तीब्र पारिएको उहाँको भनाई छ । मानन्धरका अनुसार भीमेश्वर नगरपालिका भित्र घरदैलो अभियान, मतदाता भेटघाट, कोण सभा र आमसभा जारी रहनाका साथै सामाजिक सञ्जाल र प्रविधिको उच्चतम प्रयोगबाट अभियान अगाडि बढाइएको छ ।
जिल्लाको गौरीशंकर गाउँपालिकाका सबै वडाहरूमा पहिलो चरणको घरदैलो कार्यक्रम सम्म भएको र पुनः दोस्रो चरणको घरदैलो तथा भेटघाट अभियान सुरु गरिएको गौरीशंकर गाउँपालिकाका चुनावी कमाण्डर स्वयंमबहादुर खड्काले जानकारी दिनु भयो ।
यसैगरी जिल्लाको बैत्येश्वर गाउँपालिकामा पनि सबै वडाहरूमा पहिलो चरणको घरदैलो कार्यक्रम सम्पन्न भएको र भोलि हुने गाउँपालिका स्तरीय आमसभाको तयारी भइरहेको बैत्येश्वर गाउँपालिकाका चुनावी कमाण्डर हर्कमान पाख्रिनले जानकारी दिनुभयो ।
जिरी नगरपालिकामा पनि नेकपा एमालेको तर्फबाट चुनावी प्रचारका सबै सबै वडा कमिटीलाई घरदैलो केन्द्रित गतिविधिमा परिचानल गरिएको जिरी नगरपालिकाका चुनावी कमाण्डर टंक जिरेलले जानकारी दिनु भयो ।
यसैगरी प्रतिनिधि सभा सदस्यका उम्मेदवार बालकृष्ण शिवाकोटीको गृहपालिका कालिञ्चोक गाउँपालिकामा पनि चुनावी अभिायन तीव्र पारिएको छ । कालिञ्चोक गाउँपालिकाका चुनावी कमाण्डर कालिका पाठकका अनुसार सबै वडा कमिटी परिचालन गरी घरदैलो अभियान जारी राखिएको छ ।
यस्तै बिगु गाउँपालिकामा पनि पहिलो चरणको घरदैलो अभियान सम्म्पन भई दोस्रो चरणको प्रचार–प्रचार तथा घरदैलो र मतदाता भेटघाट कार्यक्रम सञ्चालन भइरहेको बिगु गाउँपालिकाका चुनावी कमाण्डर कृष्ण भुजेलले जानकारी दिनुभयो ।
सबै क्षेत्रमा कार्यकर्ताहरू उच्च मनोबलका साथ पार्टी जिताउन खटिएको नेकपा एमाले बागमती प्रदेश सभा सदस्य तथा प्रदेश (ख)का चुनावी कमाण्डर डबल पाण्डेले बताउनुभयो । ‘हामी दुवै क्षेत्रमा १० हजार मतअन्तर तथा संघमा सोको दोब्बर मतान्तरले जित्नेगरी अभियान अगाडि बढाइरहेका छौँ,’ पाण्डेले भन्नुभयो ।
प्रकाशित | २५ कार्तिक २०७९, शुक्रबार २०:३६
