पोखरा : गैर आवासीय नेपाली संघ (एनआरएनए) ले नेपाल पत्रकार महासंघ कास्कीलाई १ लाख रुपैयाँ बराबरको स्वास्थ्य सुरक्षा सामग्री सहयोग गरेको छ।
एनआरएनएका अध्यक्ष रविना थापा, सचिव टीका गुरुङ र सहकोषाध्यक्ष अमृता थापाले महासंघ जिल्ला अध्यक्ष विमला भण्डारीलाई ९ हजार थान मास्क र ५० थान कोभिड किट्स गरी १ लाख रुपैयाँ बराबरको सहयोग हस्तान्तरण गर्नु भएको हो ।
सो अवसरमा एनआरएनएका नवनिर्वाचित पदाधिकारी तीनै जनालाई अध्यक्ष भण्डारीले बधाईसहित दोसल्ला ओढाएर सम्मान गर्नु भएको थियो । एनआरएनए अध्यक्ष थापाले आगामी दिनमा पत्रकारसँग हातेमालो गर्दै अघि बढ्ने बताउनु भयो ।
महिला पत्रकारको हकहितका लागि एनआरएनएले सक्दो प्रयास गर्ने उनको प्रतिबद्धता थियो । आफूहरु तीनै जना गण्डकी प्रदेशकै भएकाले प्रदेशको शिक्षा र स्वास्थ्य क्षेत्र सुधारका लागि सक्दो पहल गर्ने बताउनु भयो ।
पत्रकार महासंघ कास्कीको भवनमा बन्ने पुस्तकालयका लागि सहयोगको पहल गर्ने उहाँले बताउनु भयो ।
प्रकाशित | ८ बैशाख २०७९, बिहीबार १४:३२
