काठमाडौं : स्थानीय तहको निर्वाचन निजिकिंदै जाँदा नेपाल कम्युनिस्ट पार्टी (एस) ले पनि निर्वाचन सम्बन्धी तयारीलाई तीब्र बनाउँदै लगेको छ । पार्टीका अध्यक्ष माधवकुमार नेपालको नेतृत्वमा मूल निर्वाचन परिचालन कमिटी गठन गर्दै निर्वाचन सम्बन्धी तयारी तीब्र बनाएको हो ।
आज (आइतबार) बसेको एकीकृत समाजवादीको केन्द्रीय सचिवालयको बैठकले मूल निर्वाचन कमिटी र सचिवालय गठन गरेको हो । समाजवादीका महासचिव बेदुराम भुसालका अनुसार अध्यक्ष नेपालको नेतृत्वमा १ हजार १११ सदस्यीय मूल निर्वाचन परिचालन कमिटी गठन गरिएको हो ।
त्यस्तै, महासचिव भुसालको नेतृत्वमा निर्वाचन परिचालन केन्द्रीय सचिवालय गठन गरिएको छ । निर्वाचन परिचालन केन्द्रीय सचिवालयमा प्रकाश ज्वाला, गंगालाल तुलाधर, विजय पौडेल, जगन्नाथ खतिवडा, जीवनराम श्रेष्ठ, विश्वनाथ प्याकुरेल, सोमप्रसाद पाण्डे, केदार सञ्जेल, सूर्य खत्री र द्रोणाचार्य क्षेत्री सदस्य रहेका छन् ।
एकीकृत समाजवादीले स्थानीय तहमा उम्मेदवार सिफारिस गर्दा ८ मापदण्ड तय गरेको छ । पार्टी केन्द्रले वडा तह हुँदै आएका सिफारिसलाई आधार मानेर वैशाख ८ गतेभित्र उम्मेदवारको टुंगो लगाइसक्ने जनाएको छ । वडा कमिटीले चैत्र ३० गतेभित्र सिफारिस गरिसक्नुपर्ने छ । त्यस्तै, पालिका कमिटीले आगामी वैशाख २ गतेभित्र निर्णय र सिफारिस गरिसक्नुपर्ने छ ।
त्यस्तै, जिल्ला कमिटीले वैशाख ४ गतेभित्र निर्णय र सिफारिस गरिसक्नुपर्ने, प्रदेश कमिटीले आगामी वैशाख ६ गतेभित्र निर्णय र सिफारिस गरिसक्नुपर्ने छ । त्यसपछि केन्द्रीय कमिटीले आगामी वैशाख ८ गतेभित्र निर्णय गरिसक्ने समय तालिका निर्धारण गरिएको छ ।
प्रकाशित | २७ चैत्र २०७८, आईतवार १८:१०
