काठमाडौं : गैर आवासीय नेपाली संघ (एनआरएनए) को आयोजनामा हुन लागेको दोस्रो विश्व ज्ञान सम्मेलनको उद्घाटन प्रधानमन्त्री केपी शर्मा ओलीले गर्नुहुने भएको छ । एनआरएनएका अध्यक्ष कुमार पन्तका अनुसार आगामी अक्टोवर ९, १० र ११ (असोज २३, २४, २५ ) तीन दिनसम्म चल्ने भर्चुअल सम्मेलन प्रधानमन्त्री ओलीले उद्घाटन गर्ने तय भएको हो ।
सम्मेलनमा संयुक्त राष्ट्र संघअन्तरर्गतको विश्व खाद्य संगठन, आइएलओलगायत इसिमोड, एसियाली विकास बैक, राष्ट्रिय योजना आयोग र विश्व बैंकमा कार्यरत विज्ञहरुले आ–आफ्नो कार्यपत्र प्रस्तुत गर्ने भएका छन् ।
नेपाल सरकारका प्रवक्ता तथा परराष्ट्रमन्त्री प्रदीपकुमार ज्ञवाली विषेश अतिथिको रुपमा उपस्थित हुने सो सम्मेलनमा गैरआवासीय नेपाली विज्ञबाहेक साइप्रस, अमेरिका, बेलायत,चीन, जापान,फिनल्यान्ड, अष्ट्रेलिया, नर्वे,नेदरल्यान्ड, क्यानाडा, भारत, सिंगापुर, श्रीलंका, फ्रान्स, जर्मनी, दक्षिण कोरियाका वैज्ञानिकहरु सहभागी हुने भएका छन् ।
विदेशमा रहेका र विदेशबाट फर्किएका नेपालीको ज्ञान, सीप र बौद्धिकतालाई नेपालको विकास एवं समृद्धिका लागि प्रयोगमा ल्याउन दुई वर्षअघि विश्व ज्ञान सम्मेलन आयोजना गर्न सुरु गरिएको थियो ।
सम्मेलन आयोजक समितिका संयोजक डा.हेमराज शर्माका अनुसार सम्मेलन संयुक्त राष्ट्रसंघको दिगो विकासको लक्ष्य र नेपाल सरकारको १५ औँ पञ्चवर्षीय योजना, कोरोना महामारीपछि नेपालको अर्थतन्त्र, कोरोनाले नेपालमा पारेको प्रभाव र कोरोनापश्चात विश्वभर चालिएका कदम र नेपालले अवलम्बन गर्नुपर्ने रणनीतिमा केन्द्रित हुनेछ ।
एनआरएन र नेपाल सरकारको सहकार्यमा हुन लागेको यो सम्मेलनमा चार प्लेनरी सेसन र १५ सिम्पोसियम सेसनको आयोजना हुने सम्मेलन आयोजक समितिका सहसंयोजक डा. हरि दाहालले जानकारी गराउनुभएको छ ।
त्यस्तै, विश्व सम्मेलनको तयारीस्वस्प एनआएनएको क्षेत्रस्तरीय विज्ञ सम्मेलन पनि जारी छ । विश्व सम्मेलनको पूर्वतयारीस्वस्प आयोजना गरिएको विज्ञ सम्मेलन अहिलेसम्म अमेरिकाज् क्षेत्र र ओसेनीया क्षेत्रले सम्पन्न गरिसकेका छन भने अन्य क्षेत्रले कार्यक्रम घोषणा गर्दै तयारी तीब्र बनाएका छन ।
प्रकाशित | १ आश्विन २०७७, बिहीबार १२:३६
